9 oktyabr 2013 13:14
Məhəmmədrəsul Məcidov: Məqsədim ikinci dəfə dünya çempionu olmaqdı
Usta boksçularımız Qazaxıstanda təlim-məşq toplanışını davam etdirirlər. Həmişə olduğu kimi, Almatıda keçiriləcək dünya çempionatında da milil komandamız yüksək yerlərə əsas iddialılardan sayılır. Bu olimpiya idman növü ölkəmizdə aparıcı olduğundan, rinq ustalarımıza diqqət hər zaman böyükdür. Çox güman, yenə də ağır çəkili boksçularımıza etimad yüksək olacaq.
Seçmə komandamızın əsas liderləri Məhəmmədrəsul Məcidov azerisport.az müsahibəsində tarix yazacağını deyib. İnişil Bakıda keçirilmiş planetin ən güclülərinin yarışında baş mükafata sahib çıxmaqla, Ağası Məmmədovun yaxın keçmişdəki zəfərini təkrarlayan “super oğlan”, bu dəfə daha irəli gedəcəyini söyləyir:
- Dünya çempionatına hazırlığımız normal qaydada gedir. Verilən tapşırıqları tam yerinə yetirirəm.
- Hansı ölkənin boksçularını daha çox izləyirsiniz?
- Hər kəsi izləmək və hamıya qalib gəlmək lazımdır.
- Son 3 ildə beynəlxalq arenalarda ən ağır çəkidə liderlərdən sayılırsınız. Demək, rəqiblər daim sizi izləyir, taktikanızı öyrənirlər. Çox güman, bu dünya çempionatı üçün də gizli nəsə fikirləşmisiniz.
- Doğru qeyd etdiniz. Rəqiblərim artıq bütün taktikama bələddirlər. Ona görə, yeni sirrlər öyrənirəm.
- Yəqin, bu dəfə də hədəf qızıl medal olar…
- İstənilən halda, məqsədim 1-ci yer tutmaqdır. Başqa cür ola da bilməz! İnşallah, çonra qızıl medalı qazanaram.
- 2011-ci ildə Bakıda keçirilmiş planetin ən güclülərinin yarışında fəxri kürsünün zirvəsinə çıxmaqla, Azərbaycan boksunda yeni səhifə açdınız. 2-ci qızıl medalın qazanılması, artıq inanılmaz nailiyyətdi. Bəlkə də, bu uğurunuz uzun müddət rekord olaraq qalacaq.
- Bəli, bir dəfə doğma divarlar arasında çempion olmuşam. Allah qoysa, yenə də qalib olaram. Hesab edirəm ki, çox çalışıb və məşqlərdə artıq yükdən boyun qaçırmayan istənilən idmançı uğura yetişə bilər.
- Qarşıda yeni bir ciddi sınaq var - 1-ci Avropa olimpiadası. Bu mötəbər yarışda iştirak etməyi planlaşdırırsınızmı?
- Adıçəkilən oyunların evdə, Bakıda keçiriləcəyini bilirəm. Təbii, həmin yarışda iştirak edəcəyəm.
- Mübarizə aparacağınız halda, buna Rio-2016-ya keçid kimi baxacaqsınız?
- Mənə o da məlumdur ki, həmin sınaq Yay olimpiya oyunlarına lisenziya verəcək. Bunun üçün, mütləq 1-ci Avropa olimpiadasını udmalıyam. Hədəfim, nə olursa olsun, Rio olimpiya oyunlarının qalibi olmaqdı.
