25 sentyabr 2013 15:37
Fariz Məmmədov Bakıdakı I Avropa Oyunlarına qatılmağı hədəfləyir
Bu gün peşəkar boksçu Fariz Məmmədov mətbuat konfransı keçirib. Azerisport.az xəbər verir ki, boksçu Ukraynada keçirilmiş döyüşdəki qələbəsi və oktyabrda nəzərdə tutulan növbəti görüşü ilə bağlı məlumat verib.
Məmmədov bəyan edib ki, o, həm də Bakıda təşkil olunacaq I Avropa Oyunlarına qatılmağı hədəfləyir. F.Məmmədov yarışda boks növü üzrə qalib olmağı qarşıya məqsəd qoyduğunu vurğulayıb.
Boksçu, həmçinin bildirib ki, 2014-cü ildə təşkil olunacaq APB-də (Beynəlxalq Həvəskar Boks Assosiasiyasının (AİBA) Peşəkar Boks yarışı) mübarizə aparmaq niyyətindədi. Bu yarışa təklif aldığını deyən F. Məmmədov AİBA-nın yeni layihəsində qüvvəsini sınamaq niyyətdə olduğunu açıqlayıb. Peşəkar boksçu 69 kq çəki dərəcəsində qalib olaraq 2016-cı il Rio-de-Janeyro Yay Olimpiya Oyunlarına lisenziya qazanmaq niyyətindədi.
Peşəkar boksçunun daha bir hədəfi isə peşəkar boksda məşhur versiyalardan sayılan WBO, WBC, WBA və İBF-in birində Avropa kəmərinə yiyələnməkdi. Vaxtilə bu versiyalardan 3-də "İntercontinental" kəməri qazandığını xatırladan F. Məmmədov deyib ki, boksdan 8 ilədək uzaq qalması səbəbindən uğurlarını davam etdirə bilməyib.
