8 iyun 2013 00:34
İki boksçumuz Avropa Çempionatının finalında
Belarusun paytaxtı Minskdə keçirilən boks üzrə Avropa çempionatında finalçılar məlum olub. Azerisport.az xəbər verir ki, Azərbaycan milli komandasının 2 üzvü həlledici görüşdə iştirak etmək hüququ qazanıb.
Olimpiya oyunlarının bürünc mükafatçısı, Avropa çempionu Teymur Məmmədov yarımfinalda ukraynalı Denis Poyatsıka ilə qarşılaşıb. Hər 3 hakim boksçumuzun qələbəsini qeydə alıb – 29:27, 29:27, 29:27. Teymur finalda rusiyalı Aleksey Yeqorovla üz-üzə gələcək.
Dünya çempionu Məhəmmədrəsul Məcidov (91+kq) isə döyüşmədən finala vəsiqə qazanıb. Boksçumuz yarımfinalda təcrübəli belarusiyalı idmançı Viktor Zuyevlə döyüşməli idi. Ancaq Zuyev rinqə çıxmaqdan imtina edib. Milli komandamızın üzvü finalda rusiyalı Avropa çempionu Sergey Kuzminlə döyüşəcək.
Elvin Məmişzadə (52 kq) hakimlərin qeyri-obyektivliyi səbəbndən yalnız bürünc medalla kifayətlənməli olub. Uels nümayəndəsi Endryu Şelbi ilə döyüşdə ilk iki raundda üstünlük Azərbaycan idmançısının tərəfində olsa da, hakimlər qələbəni rəqibə veriblər.
Salman Əlizadə (49 kq) isə yarımfinalda irlandiyalı Patrik Barnsa ciddi müqavimət göstərə bilməyib. Hər 3 hakim Barnsın qələbəsini qeydə alıb – 30:27, 30:27, 30:27.
Beləliklə, Məmişzadə və Əlizadə Avropa çempionatının bürünc medalına layiq görülüblər.
