5 iyun 2013 18:16
Yığmamız AÇ-də ilk medalı təmin etdi!
Belarusun paytaxtı Minskdə keçirilən boks üzrə Avropa çempionatında Azərbaycan milli komandası ilk medalı təmin edib. Azerisport.az xəbər verir ki, 49 kq çəki dərəcəsində yer alan Salman Əlizadə 1/4 final səddini uğurla dəf etməyi bacarıb.
Gürcüstanlı Dato Nanava ilə qarşılaşmada hər 3 raund eyni hesabla yekunlaşıb – 28:28. Lakin hakimlər ilk 2 raundda Əlizadənin, sonuncuda isə Nanavanın daha üstün döyüşdüyü qənaətinə gəliblər. Boksçumuz növbəti mərhələdə irlandiyalı Patrik Barneslə üz-üzə gələcək.
Lakin 1/4 finaldakı növbəti boksçumuz Samir Məmmədov (56 kq) ermənistanlı Aram Avaqyana uduzub. Birinci və üçüncü raundlarda Avaqyan 29:28, ikincidə isə Məmmədov 30:27 hesabı ilə üstün olub.
Qeyd edək ki, qaydalara əsasən, yarımfinala yüksələnlər ən azı bürünc medalı təmin edirlər. 1/4 finalda daha 6 boksçumuz döyüşə çıxacaqlar.
