4 dekabr 2012 00:38
Yığmamızın daha iki üzvü İrəvanda 1/4 finala çıxdı
Ermənistanın paytaxtı Yerevanda gənclər arasında boks üzrə dünya birinciliyi davam edir. Azerisport.az xəbər verir ki, növbəti yarış günündə ilk olaraq boksçularımızdan Pərviz Bağırov (64 kq) rinqə çıxıb. O, 1/8 final mərhələsində Almaniya boksçusu Marsel Orsingerlə qarşılaşıb. İlk raunddan üstünlüyü ələ alan gənclər arasında Avropa çempionumuz ilk hissədə 7:1 hesabı ilə üstün olub. İkinci raund da boksçumuzun eyni hesablı qələbəsi ilə başa çatıb. Bağırov həlledici raunda rahat çıxmasına baxmayaraq, bu dəfə də rəqibinə daha çox dəqiq zərbə endirib - 6:1. Ümumi hesabda 20:3 hesabı ilə qalib gələn Bağırov 1/4 finala vəsiqə qazanıb. Onun növbəti mərhələdəki rəqibi litvalı Eimantas Stanionis olacaq.
Orxan Mayıllı (75 kq) 1/8 final mərhələsində venesuelalı Nalek Korbaj Barrera ilə qarşılaşıb. Birinci raund boksçumuzun 5:3 hesablı üstünlüyü ilə yekunlaşıb. Mayıllı ikinci hissədə də eyni hesabla qalib gəlib. Nəhayət, həlledici raunda həmyerlimiz daha inamlı döyüşüb - 6:2. Nəticədə 16:8 hesabı ilə qalib gələn Orxan Mayıllı da 1/4 finala vəsiqə əldə edib. Onun bu mərhələdəki rəqibi Daulet Bayqabatov (Qazaxıstan) olacaq.
Boksçularımızdan son olaraq Tural Əhmədov (52 kq) rinqə çıxıb. Onun rəqibi hindistanlı Dheeraj olub. Təəssüf ki, boksçumuz Hindistan nümayəndəsinə uduzaraq, mübarizəni dayandırıb - 12:20.
Qeyd edək ki, bir gün öncə 91 kq çəki dərəcəsində mübarizə aparan Rahil Məmmədli də 1/4 finala vəsiqəni təmin etmişdi. Məmmədlinin növbəti rəqibi İngiltərə idmançısı Daniel Uilyams olacaq.
