30 oktyabr 2012 12:24
Yığmamızın Ermənistana gedəcəyi dəqiqləşdi
Azərbaycanın gənclərdən ibarət boks yığması noybayrın 25-də Ermənistanda start götürəcək boks üzrə Avropa çempionatında iştirak edəcək. Azerisport.az xəbər verir ki, artıq Azərbaycan Boks Federasiyası İrəvana getməyə qərar verib.
Qeyd edək ki, millimizin bu qitə birinciliyinə yollanması sual altında idi. Federasiya qarşı tərəfdən təhlükəsizliklə bağlı təminat tələb etmişdi. Artıq Ermənistan tərəfi təhlükəsizlik təminatı ilə bağlı Azərbaycanın Boks Federasiyasına məktub göndərib.
Yığmamız İrəvana 10 nəfərlik nümayəndə heyəti ilə yollanacaq. Onlardan altısı məhz boksçu olacaq.
Maraq üçün bildirək ki, boks yığmamız hazırda Qazaxıstanda beynəlxalq turnirdə çıxış edir. Komandamız bu turnirdə 13 boksçu ilə təmsil olunur. Bunlar Rauf Rəhimov, Pərviz Bağırov, Ceyhun İbrahimli, Rahil Məmmədli, Tural Əhmədov, Kamran Məlikov, Nəsrəddin Məmmədov, Saqi Salehli, Orxan Mayıllız, Sadiq Səmədov, Rüstəm Musayev, Fərid İsmayılov və Nəbi Bağırovdu.
Məşqçilər Şamil Əlizamanov və Vidadi Tağıyev İrəvana aparılacaq altı boksçunu məhz Qazaxıstandakı beynəlxalq turnir başa çatandan sonra müəyyənləşdirəcək. Avropa çempionatı noyabrın 25-dən dekabrın 8-dək davam edəcək.
