3 may 2012 15:44
Fariz Məmmədovun rəqibi erməni boksçu oldu
Azərbaycanın peşəkar boksçusu Fariz Məmmədovun mayın 12-də Almaniyada keçirəcəyi döyüşdəki rəqibi müəyyənləşib. Azerisport.az xəbər verir ki, həmyerlimiz erməni idmançı Geqise Tomazyanla qarşılaşacaq.
Fariz Məmmədov bu münasibətlə keçirilən mətbuat konfransında bildirib ki, peşəkar idmana cəmi 5 həftə əvvəl qayıtmasına baxmayaraq, erməni idmançının çağırışına etiraz etməyib: "Mən sentyabr ayına qədər istənilən təklifə razı olmayacaqdım. Lakin buna etiraz edə bilmədim. Çünki yeddi ildi ki, bu döyüşü arzulamışam ".
Azərbaycanın ilk peşəkar boksçusu Fariz Məmmədov yeddi il həbsxana həyatı yaşadıqdan sonra yenidən peşəkar idmana qayıdıb. Bu günlərdə isə Məmmədov Almaniyanın boks şirkətlərinin biri ilə müqavilə imzalayıb.
Avstriyada yaşayan, Ermənistanın adından çıxış edən Geqise Tomazyan 16 görüş keçirib, 14-də qalib gəlib.
WBCA üzrə beynəlxalq kəmər uğrunda Fariz Məmmədovla Geqise Tomazyan arasında keçiriləcək döyüş 12 raunddan ibarət olacaq.
