18 dekabr 2011 13:34
Xəzər Lənkəranın prezidenti azarkeşlərlə görüşdü
Bu yaxınlarda bir qrup ziyalı “Xəzər Lənkəran” azarkeşi klub prezidenti Mais Mənsimovla görüş barədə müraciət etmişdilər. Azerisport.az xəbər verir ki, bu müraciəti qəbul edən klub prezidenti yaşlı azarkeşlərlə görüşüb.
Görüş zamanı ziyalı azarkeşlərlə fikir mübadiləsi aparılıb. Hazırda klubda olan vəziyyət hər tərəfli müzakirə edilib. Təcrübəli azarkeşlər bu gün “Xəzər”sevərləri narahat edən məsələləri dilə gətiriblər. Klub prezidenti azarkeşlərin hər zaman klubun yanında olmasının vacibliyini bildirməklə, onların dəstəyinin komandanın göstərdiyi nəticələrdən asılı omayaraq əhəmiyyətli olduğunu nəzərə çatdırıb.
Mənsimov ziyalıların müxtəlif məsələlər barədə fikirlərini diqqətlə dinləyərək klub üçün azarkeş mövqeyini vacibliyini də bildirib. Həm klub prezidenti, həm ziyalılar belə görüşlərin tez-tez keçirilməsinin faydalı olduğunu söyləyiblər. Klubun daxilinə aid olan müəyyən məsələlərin mətbuata açıqlanması mümkün olmadıqda, məhz azarkeşlərlə görüş vasitəsilə qaranlıq məqamlara aydınlıq gətirilməsinin ən yaxşı yol olduğu qeyd olunub.
“Xəzər Lənkəran” prezidenti klubla azarkeşlərin birliyini ön plana çəkərək, bu istiqamətdə ”Xəzər”sevərlərin istək və təkliflərinə həmişə diqqətlə yanaşıldığını və bundan sonra da yanaşılacağını bildirdi. Keçirilən görüşdən məmnun qaldıqlarını bildirən ziyalı azarkeşlər də kluba hər zaman bacardıqları dəstəyi verməyə hazır olduqlarını klub prezidentinin diqqətinə çatdırıblar.
