24 oktyabr 2011 12:51
Yığmamızın üzvü dünyanın ən güclüsü seçildi
AİBA 2011-ci ilin ən yaxşı boksçularının adlarını açıqlayıb. Azerisport.az xəbər verir ki, başa çatmaqda olan ilin ən yaxşı boksçusu Azərbaycan milli komandasının üzvü Məhəmmədrəsul Məcidov seçilib.
Superağır çəki dərəcəsində mübarizə aparan həmyerlimiz WSB liqasının fərdi yarışlarında 2-ci nəticə göstərmişdi. Məcidov yalnız həlledici döyüşdə italiyalı Klemente Russoya uduzmuşdu.
Bakıda keçirilən dünya çempionatı isə boksçumuz üçün daha uğurlu oldu. Bütün rəqibləri üzərində inamlı qələbə qazanan yığmamızın üzvü fəxri kürsünün ən yüksək pilləsinə qalxdı. Qeyd edək ki, Məcidov dünya çempionatında keçirdiyi 4 görüşün ikisini vaxtından əvvəl aşkar üstünlüklə başa vurmuşdu. O, Kolumbiya və kubalı rəqiblərini nokautla məğlub etmişdi.
Mükafatlandırma mərasimi noyabrın 27-də Londonda keçiriləcək. Xatırladaq ki, ötən il “ən yaxşı gənc boksçu” nominasiyasında həmyerlimiz Şaban Şahpələngov fərqlənmişdi.
