21 sentyabr 2011 15:43
Ermənistan və Rusiya yığmaları Bakıda xüsusi bazada qorunacaq
Boks üzrə Rusiya və Ermənistan milli komandaları Bakıda keçiriləcək dünya çempionatı müddətində digər komandalardan aralıda – şəhər kənarındakı xüsusi qorunan idman bazasında qalacaqlar. Azerisport.az xəbər verir ki, bu sözləri Rusiya Boks Federasiyasının icraçı direktoru Yevgeni Sudakov “Ves Sport” agentliyinə açıqlamasında deyib.
O, bildirib ki, Azərbaycan Boks Federasiyası (ABF) rəhbərliyi ilə əldə olunan müvafiq razılaşma məlum səbəblərdən irəli gəlir: “Bu, siyasi xarakterli qərardı. Bizim komandanın heyətində 2 erməni soyadlı boksçu – David Ayrapetyan və Mişa Aloyan var. Hərçənd, ermənilər və azərbaycanlılar arasındakı açıq etnosiyasi münaqişə artıq geridə qalıb, amma hər halda biz sığortalanmağı qərara aldıq”.
Qeyd edək ki, Həm Ermənistan, həm də Rusiya yığmaları Azərbaycan paytaxtına sentyabrın 23-də gələcəklər. 2012-ci il London Yay Olimpiya Oyunlarına lisenziya xarakterli dünya çempionatı sentyabrın 26-da start götürəcək. Yarış oktyabrın 8-dək davam edəcək.
