21 sentyabr 2011 13:52
Azərbaycan DÇ üçün heyətini açıqladı
Sentyabrın 26-da Bakıda kişi boksçular arasında start götürəcək 2012-ci il London Yay Olimpiya Oyunlarına lisenziya xarakterli dünya çempionatı üçün Azərbaycan milli komandasının heyəti açıqlanıb. Azerisport.az xəbər verir ki, ölkəmiz 10 mümkün çəki dərəcəsinin 9-da təmsil olunacaq.
Oktyabrın 8-dək davam edəcək çempionatda 2 Avropa çempionumuz – Salman Əlizadə (49 kq) və Teymur Məmmədov (91 kq), qitə çempionatının gümüş mükafatçısı Elvin Məmişzadə (52 kq), bürünc mükafatçı Heybətulla Hacıəliyev (64 kq), eləcə də Rəhim Nəcəfov (56 kq), Elvin İsayev (60 kq), Emil Əhmədov (69 kq), Ramil Əliyev (81 kq) və Məhəmmədrəsul Məcidov (+91 kq) mübarizə aparacaq.
Daha bir boksçumuz - Soltan Migitinov (75 kq) WSB (Ümumdünya Boks Seriyası) Liqasından olimpiadaya vəsiqəni təmin edib. Bu üzdən də sözügedən çəki dərəcəsində təmsilçimiz olmayacaq.
Sonda onu da qeyd edək ki, yığmamız dünya çempionatı öncəsi Rusiyanın Çexov şəhərində təlim-məşq toplanışında olub. Abdullayev Rusiya millisi ilə birgə hazırlıq prosesindən razı qaldıqlarını bildirib. Onun fikrincə, bütün boksçularımız London olimpiadasına lisenziya qazanmağa qadirdirlər.
Qeyd edək ki, dünya çempionatında 10 çəki dərəcəsindən ilk 8-də (49 kq, 52 kq, 56 kq, 60 kq, 64 kq, 69 kq, 75 kq, 81 kq) 1 – 10-cu yerləri, ağır çəkilərdə (91 kq və +91 kq) isə 1 – 6-cı yerləri tutanlar 2012-ci il London Yay Olimpiya Oyunlarına lisenziya qazanacaqlar.
