20 sentyabr 2011 13:47
Rusiya yığması Ayrapetyanı Bakıya gətirir
Boks üzrə Rusiya milli komandası Bakıda keçiriləcək dünya çempionatı üçün heyəti açıqlayıb. Azerisport.az xəbər verir ki, yarışın əsas favoritlərindən olan şimal qonşumuz Azərbaycan paytaxtına ən güclü boksçularını gətirir.
Məşqçilər korpusu son Rusiya çempionatında fərqlənmiş idmançılara üstünlük veriblər. Bu ilin iyununda Ankarada keçirilmiş Avropa çempionatında Maksim Koptyakov (75 kq) və Məhəmməd Ömərov (91+kq) qızıl medala layiq görülsələr də, Bakıda onları müvafiq olaraq, Artyom Çebotaryov və Sergey Kuzmin əvəzləyəcək. Nikolay Xromovun komandasında həm dünya, həm də Avropa çempionu tituluna sahib olmuş 3 boksçu var. Bunlar Albert Səlimov, Yeqor Mexontsev (81 kq) və Artur Beterbiyevdi. Yeri gəlmişkən vurğulayaq ki, rusların heyətində erməni David Ayrapetyan və Mişa Aloyan da Bakıya gəlir.
Qeyd edək ki, Rusiya komandası sentyabrın 23-ü səhər saatlarında Bakıda olacaq.
Rusiya milli komandasının heyəti:
49 kq: David Ayrapetyan (Avropa Çempionu (2006), dünya çempionatının gümüş mükafatçısı (2009)
52 kq: Mişa Aloyan (Dünya çempionatının bürünc mükafatçısı (2009), Avropa çempionu (2010)
56 kq: Sergey Vodopyanov (Dünya çempionu (2007), dünya çempionatının gümüş mükafatçısı, 2009)
60 kq: Albert Səlimov (Dünya çempionu (2007), Avropa çempionu (2010)
64 kq: Aleksandr Solyanikov (Avropa çempionatının bürünc mükafatçısı 2010)
69 kq: Andrey Zamkovoy (dünya çempionatının gümüş mükafatçısı 2009)
75 kq: Artyom Çebotaryov (Avropa çempionu 2010)
81 kq: Yeqor Mexontsev (Dünya çempionu ( 2009), Avropa çempionu (2010)
91 kq: Artur Beterbiyev (Dünya çempionu (2009), Avropa çempionu (2010)
91+kq: Sergey Kuzmin (Avropa çempionu 2010)
