6 sentyabr 2011 18:01
Dörd boksçumuz üçün Ukrayna sınağı
Bu gün - sentyabrın 6-da Ukraynanın Nikolayev şəhərində boks üzrə qadınlar arasında beynəlxalq turnir start götürüb. Azerisport.az xəbər verir ki, yarışda 22 ölkənin nümayəndələri mübarizə aparacaq.
“Nikolaev City Cup 2011” turnirinə qadın boksunda ciddi uğurları olan Rusiya, İsveç, Çin, Kanada, Fransa, Bolqarıstan və sair ölkələrin təmsilçiləri iştirak edir. Azərbaycan milli komandası baş məşqçi Aleksandr Denisovun rəhbərliyi altında turnirdə 4 boksçu ilə təmsil olunacaq. Bunlar Patimat Urusova (51 kq), Əzizə Abbasova (54 kq), Ayzanat Hacıyeva (61 kq) və Yelena Vıstropovadı (69 kq).
Bundan öncəki yarışlarda 75 kq çəki dərəcəsində çıxış etmiş Vıstropova bu dəfə fərqli çəkidə yarışacaq. Ancaq onun qarşıdakı yarışlarda yenidən 75 kq çəki dərəcəsində çıxış etməsi gözlənilir. “Nadejda” İdman-Kompleksində keçiriləcək yarışı kiçik dünya çempionatı da adlandırırlar. Sentyabrın 6 və 7-də ilkin mərhələnin döyüşləri, sentyabrın 8-də yarımfinal, 10-da isə final döyüşləri təşkil olunacaq.
Qeyd edək ki, 2012-ci il London Olimpiadasının proqramına ilk dəfə olaraq qadın boksu da daxil edilib. Qadın boksu yarışları Olimpiya oyunlarında 3 çəki dərəcəsində - 51, 60 və 75 kq-da keçiriləcək.
