29 iyun 2011 12:37
Millimizdən Avropa birinciliyinə uğurlu start
Macarıstanın Kestxey şəhərində yeniyetmələr arasında boks üzrə Avropa birinciliyi start götürüb. Azerisport.az xəbər verir ki, milli komandamız yarışda baş məşqçi Rasim Məmmədov və məşqçi Rauf Aydınovun rəhbərliyi altında 12 boksçu ilə təmsil olunur.
Yarışın ilk günündə mübarizəyə qoşulan həmyerlilərimizdən yalnız Natiq Kazımov (48 kq) uduzaraq, mübarizəni dayandırıb. Natiq Kazımov şotlandiyalı Reeke Makfadenə uduzaraq, mübarizədən kənarda qalıb - 11:18. Digər boksçularımız isə ilk döyüşlərini qələbə ilə başa vurublar.
Qeyd edək ki, Avropa birinciliyində Kazımovdan başqa, Araz Gülməmmədov (46 kq), Orxan Əliyev (50 kq), Nəsrəddin Məmmədov (52 kq), İman Əhmədli (54 kq), Nurlan Nağıyev (57 kq), Telman Qafarlı (60 kq), Əli Həsənov (63 kq), Nəbi Bağırov (66 kq), Orxan Mayıllı (70 kq), Rahil Məmmədli (80 kq) və Məhəmmədəli Tahirov (80+kq) mübarizə aparır.
İdmançılarımızdan Rahil Məmmədli ilk görüşdə Macarıstan nümayəndəsi Tamaş Varadini 10:2 hesabı ilə üstələyib. 46 kq çəki dərəcəsində mübarizə aparan Araz Gülməmmədov ilk görüşdə İsrail nümayəndəsi Elhaib Falahı 14:0 hesabı ilə məğlub edib. Həmyerlimizin növbəti mərhələdəki rəqibi rumıniyalı Georgian Tudor olacaq.
50 kq-da mübarizə aparan Orxan Əliyev isə ilkin mərhələdə parlaq qələbə qazanıb. Orxan 1-ci raundda yunanıstanlı Ramin Agkitzidisi rinqə çıxmağa peşman edib. Görüş vaxtından əvvəl başa çatıb. Əliyev növbəti mərhələdə Belarus boksçusu Anton Balla üz-üzə gələcək.
Nurlan Nağıyev (57 kq) ilk döyüşünü Xorvatiya idmançısı Luka Plantikə qarşı keçirib. 27:17 hesabı ilə qalib gələn Nağıyev növbəti mərhələdə israilli Tal Ahronovla döyüşəcək.
60 kq çəki dərəcəsində yarışan Telman Qafarlı Moldova nümayəndəsi Andrey Bovbolanı 6:1 hesabı ilə məğlub edib.
Orxan Mayıllı ( 70 kq) da ilk görüşünü qələbə ilə başa vuranlar arasındadı. O, finlandiyalı Dmitri Keroneni 15:6 hesabı ilə üstələyib.
Rahil Məmmədli (80 kq) Macarıstan boksçusu Tamaş Varadini (10:2), Məhəmmədəli Tahirov isə (80+kq) isə türkiyəli Yaman Qarıkı (17:6) məğlubiyyətə uğradıb.
İyulun 2-də başa çatacaq Avropa birinciliyində ölkəmizi hakim kimi Fuad Aslanov təmsil edir.
