24 iyun 2011 12:46
Millimizin üzvü türkiyəli azarkeşlərdən dəstək istədi
Boks üzrə Avropa çempionatının finaı görüşündə mübarizə aparacaq mili komandamızın üzvü Teymur Məmmədov qızıl medal qazanmaq üçün əlindən gələni edəcəyini deyib. Azerisport.az xəbər verir ki, yarımfinalda alman Johan Vitti məğlub edən boksçumuzu finalda təcrübəli Tervel Pulev gözləyir:
“İndiyədək onunla rinqdə üz-üzə gəlməmişəm. Amma Pulev artıq uzun illərdi ki, dünya boksundadı. Son Avropa çempionatının gümüş mükafatçısıdı. Amma biz də bu yarışa gələrkən, qarşımıza müəyyən məqsədlər qoymuşuq. Yerli azarkeşləri də bizə dəstək olmağa çağırıram. Avropa çempionatının qızıl medalını qazanmaq istəyirəm”.
18 yaşlı idmançı zərbələrinin o qədər də qüvvətli olmaması ilə bağlı fikirlərə də cavab verib: “Bəlkə də bu kənardan daha aydın görünür. Nəzərə alın ki, mənim çəkim 83 kq-dı. Rəqiblərimdən 7-8 kq zəif oluram. Bu isə boksda böyük rəqəmdi. Buna görə də zərbələrim onlar üçün sarsıdıcı olmur. Amma digər keyfiyyətlərimdən istifadə etməyə çalışıram”.
Xatırladaq ki, boks üzrə Avropa çempionatının final görüşləri bu gün Bakı vaxtı ilə saat 16:00-da başlayacaq.
