24 iyun 2011 11:27
Salman Əlizadə: Tam gücümü ortaya qoymadım
Boks üzrə Avropa çempionatında finala vəsiqə qazanan Salman Əlizadə ən yaxşı görüşünü yarımfinalda keçirdiyini deyib. Azerisport.az xəbər verir ki, qızıl medalın bir addımlığında olan həmyerlimiz bunları dilə gətirib:
“1/4 finalda Fransa boksçusu Jeremi Bekku ilə döyüşdə daha çox əziyyət çəkdim. Çünki o mənə uyğun rəqib deyildi. Amma yarımfinalda ingiltərəli Çarli Edvardsı udacağımı bilirdim. Onun döyüş tərzi mənim qələbə qazanmağımı asanlaşdırdı. Avropa çempionatında ən yaxşı görüşümü keçirdim. Bu dəfə yorğunluq da yaranmadı. Finala çıxdığım üçün sevincliyəm”.
Əlizadə qitə çempionatının finalında Rusiya nümayəndəsi Belik Qalanovla görüşəcək. Qeyd edək ki, milli komandamız Avropa çempionatına Rusiya yığması ilə birgə hazırlaşıb. Bu səbəbdən də boksçular bir-birlərini yaxşı tanıyırlar: “Təlim-məşq toplanışında bir yerdə idik. Amma rusiyalı boksçular özlərini qorumağa çalışırdılar. Mən də onların çəkliş etdiyini görüb, tam gücümü ortaya qoymadım. Finalda qalib gəlməyə çalışacam. Bu gücü özümdə hiss edirəm. Ancaq bu idmandı, hər şey ola bilər”.
