23 iyun 2011 18:28
İki boksçumuz AÇ-nin finalında (YENİLƏNİB)
Türkiyənin Ankara şəhərində boks üzrə Avropa çempionatı davam edir. Azerisport.az xəbər verir ki, bu gün yarımfinal görüşləri keçirilib.
40 ölkənin 250-dək boksçusunun mübarizə apardığı turnirdə bu gün Azərbaycan yığmasının 3 üzvü rinqdəki bacarığını nümayiş etdirmək hüququ qazanıb. 1/4 final mərhələsini uğurla adlayaraq, ən azı bürünc medalı özləri üçün təmin etmiş Salman Əlizadə (49 kq), Heybətulla Hacıəliyev (64 kq) və Teymur Məmmədov (91 kq) finala çıxmağa çalışıb.
49 kq çəki dərəcəsində yarışan Salman Əlizadə ingiltərəli Çarli Edvardla qarşılaşıb və ona qalib gələrək, adını finala yazdırıb. Həlledici görüşdə həmyerlimiz rusiyalı Belik Qalanovla döyüşəcək.
64 kq çəki dərəcəsində mübarizə aparan Heybətulla Hacəliyev isə İrlandiyanı təmsil edən Raymond Moyletlə döyüşdə məğlub olaraq, bürünc medalla kifayətlənməli olub.
Teymur Məmmədova (91 kq) gəlincə, o, finala vəsiqə üçün almaniyalı Yohan Vitti mübarizədən kənarlaşdırmalıydı ki, bunu da bacarıb - 18:12. Məmmədov finalda bolqarıstanlı Tervel Pulevlə döyüşəcək.
