19 iyun 2011 00:03
AÇ-nin 2-ci günündə 3 qələbə, 1 məğlubiyyət (YENİLƏNİB)
Türkiyənin Ankara şəhərində boks üzrə Avropa çempionatı davam edir. Azerisport.az xəbər verir ki, yarışın ikinci günündə Azərbaycan yığmasının daha 4 üzvü rinqdəki bacarığını nümayiş etdirmək hüququ qazanıb.
40 ölkənin 250-dək boksçusunun mübarizə apardığı turnirin ikinci günündə Rəhim Nəcəfov (56 kq), Heybətulla Hacəliyev (64 kq), Osman Əliyev (69 kq) və Teymur Məmmədov da (91 kq) millimizin uğurlu çıxışına töhfə verməyə çalışıb.
56 kq-da mübarizə aparan Rəhim Nəcəfov ilk görüşdə bolqarıstanlı Detelin Dalakliyevlə üz-üzə gəlib. Lakin o, rəqibinə 11:16 hesabıyla məğlub olub.
64 kq-da Heybətulla Hacəliyevin rəqibi latviyalı idmançı Artur Əhmədov olub. Bu rəqibini 21:12 hesabıyla məğlub etməyi bacaran təmsilçimiz növbəti döyüşünü çexiyalı Zdenek Çladekə qarşı keçirəcək.
69 kq-da yarışan Osman Əliyev sloveniyalı Elvin Bruliçlə qarşılaşır. Boksçumuz rəqibini aşkar fərqlə üstələyib - 21:4. Növbəti rəqib rusiyalı İslam Yedisultanovdu.
91 kq-dakı təmsilçimiz Teymur Məmmədov isə Macarıstan idmançısı Yozef Darmoşu rinqdən məğlub yola salmağı bacarıb. Düzdü, onların döyüşü bərabər hesabla bitib - 20:20. Amma hakimlər üstünlüyü bizim idmançımıza veriblər.
