24 yanvar 2011 13:57
Yevgeni Kotov yığmamızla ilk hazırlığa Zaqatalada başladı
Azərbaycan Boks Federasiyası milli komandanın fiziki hazırlığını yüksəltmək məqsədi ilə Zaqatalada 14 günlük təlim-məşq toplanışı keçirir. Azerisport.az xəbər verir ki, toplanışa 20-ə yaxın boksçu cəlb olunub ki, onların arsında gənclər də az deyil.
Boks üzrə milli komandamızın məşqçisi Nəriman Abdullayev hazırlığın Zaqatalada keçirilməsinin heç də təsadüfi olmadığını bildirib. Onun sözlərinə görə, dağlıq ərazidə yerləşən Zaqatalada boksçuların fiziki hazırlığını yoxlamaq üçün hər cür şərait var.
İdmançılar gündə 3 dəfə məşqlərə cəlb olunur. Əsas məqsəd isə Macarıstanda keçiriləcək beynəlxalq turnirə hazırlıqdır. Bu dəfəki toplanışa ilk dəfə olaraq gənclərdən Salman Əlizadə, Şaban Şahpələngov və Elvin İsayev cəlb edilib.
Abdullayev hazırlığı da dəyərləndirib: “Zaqatala toplanışının ilkin nəticələrini yüksək qiymətləndirmək olar. Belə ki, boksçuların fiziki hazırlığı hər gün artmaqdadır. Bu da ilk növbədə onların dağlıq ərazidə məşqlərə cəlb olunmasından irəli gəlir. Sentyabrda Bakıda lisenziya xarakterli Dünya çempionatı keçiriləcək. Və biz indidən yığma komandanın üzvlərinin fiziki hazırlığını artırmaq haqda düşünürük”.
Qeyd edək ki, Zaqatala toplanışı milli komandamızın yeni baş məşqçisi Yevgeni Kotovun ilk hazırlığıdır.
